(無聊記事) 小小車迷

(無聊記事)

平日我見到Ball做得最多既嘢就係咁!

一早起身, 自己屋企, 人哋屋企, 食完飯, 瞓覺前..都係

完全沉醉, 自言自語, 忘我

今朝, 又係咁, 哈哈

購物反映性格

Ball年紀小小就已經有不少購物體驗

我們都在可控制的範圍及有限選擇下

俾佢自己做決定, 例如

(1) 2揀1 (食飯/食麵, 紅色/藍色)

(2) 可以揀2樣嘢買 (揀2架車仔, 揀2件T-Shirt)

(3) 叫佢為小朋友Party揀食物, 

叫佢揀小朋友鐘意食既食物

我覺得咁樣係對小朋友既一種"尊重"

亦令佢明白要對自己既選擇要負責任

因為咁, 做選擇的時候, Ball好似唔會好多心

好快就有決定, 仲要好專一, 好少會動搖

(就算有其他我覺得比較吸引既,

佢都只係攞嚟睇吓, 唔會改變主意, 

好阿伯, 哈哈)

唔知咁樣係固執定係真係好知道自己想點

又或者呢個係佢星座既特點 --

天蠍: 執著, 信念堅定, 能堅持, 做每件事都非常投入 

(因此天蠍男據了解係好吸引人o家) 

父親節/ 兒童節??

6/15星期日, 即父親節

俾爸爸放假去踢波

亦造就了半個兒童節

一大早爸爸就興高采烈, 換哂波衫同班"叔叔"慶祝

我就同Ball到樓下踩單車

(其實Ball有得踩單車超開心,
都唔關同邊個慶祝咩節事) 

Lunchtime因為時間關係, 一家人去左食烏冬

(又係Ball的最愛, 食左一大碗呀!!)

之後睇睇吓傢俬忽然又唔知點解買左張Pantone摺椅俾Ball

Ball自己揀左藍色, 一路話好鐘意 

(參考圖片)

夜晚先最最最開心

一家人第一次一齊食居酒屋

初初都擔心唔知有咩啱小朋友食

不過原來好多嘢,包括: 燒飯團, 燒粟米, 燒魚, 燒蔬菜等等

都好啱佢食, 仲好好味 :)

Ball食得仲多過我!!

(兩父子對飲中, 好攪笑!!)

飯後一家人到訪Lab-made食雪糕

好似去左仙境咁, 分子雪糕真係唔簡單!

爸爸叫左個爸爸節Special, 上面仲有塊Bacon

食到手指指

開心完滿的一天, 飽到攬住個肚瞓! 

Happy Papa's Day :)

無禮貌事件

認住呢個惡人!!

[Ball在食麵包]

Ma: Ball, 麵包好唔好味呀? 鐘唔鐘意食呀?要唔要飲水?

Ball: 0殊! 請輕聲點!! 

[Ball瞓唔醒, 發眼瞓惡]

Grandpa: 起身未呀? 咁好瞓既? 

Ball: 阿公走呀, 你走呀!!

[Ball在睇電視]

Ma: 個卡通好唔好睇呀? 

不如影張相俾爸爸睇吓你個開心樣啦?

Ball: 唔好影啦, 唔好影我呀! (再一手推開個iPhone) 

[大人講嘢中]

Ball: lalalalalablahblahblah

大人: 唔好咁嘈啦

Ball: (唱歌) 阿婆, 媽咪, 阿公, 唔好講嘢啦

大人: 唔好冇禮貌呀! 靜d啦!

Ball: 持續大叫, 拍手, 騷擾, 直到有人聽佢講嘢

(attention seeker or....?)

[Ma講電話中]

Ball: 講完未呀? 媽講咩呀? 講好耐呀, 

媽打電話俾邊個呀? Edison要講呀, 

Edison 要玩Game呀, 講完未呀? 

好耐呀... (直到你放低電話問佢咩事)

[睇電視中]
Ball: 我唔鐘意睇呢個
(之後即刻熄左個電視走人, 冇理會其他人感受)

呢d係唔係冇禮貌?

佢好似唔明白咩叫冇禮貌

好多時都控制唔到佢, 

只可以教完唔得

就停低佢唔鐘意你做緊既嘢去"應付"佢

點算? 3歲就會好d? 

血案!!

2013年6月11日晚上6時許

Ball於婆婆家中, 因興奮過度亂跑

飛墮地上, 下巴先著地

爆開了, 血直流, 一家直奔養和

因為係面部出事, 我超緊張, 拒絕一般急症醫生

要姑娘電召外科整形醫生為Ball修復美貌

45分鐘等待.. 好漫長

姑娘先用紗布包好傷口, 當時已經冇流血

兩父子, 打機打發時間

(請留意爸爸件血跡斑斑既恤衫,

係佢英雄救囝時留下的) 

之後醫生到來, 就是我們一家"血腥噩夢"的開始

整個過程非常殘忍, 除了一支打在傷口的麻醉針外

好似冇咩做過就要馬上, 活生生地 "縫針"

始終係小朋友, 幾個大人一盞大光燈, 好難要佢唔驚唔掙扎

你越要佢冷靜佢越要喊, 攪到我都好想喊!!

(醫生話如果小朋友唔合作, 就要全身麻醉, 仲要瞓醫院!!) 

合眾人之力, 用貼紙, 令Ball喊吓唔喊吓

再由姑娘"禁"住佢個頭同身等醫生做嘢

好彩醫生快快手, 縫左5針, 縫埋個傷口

Ball就喊到眼袋既微絲血管都爆埋.. 超慘豬

等攞藥時爸爸買左strawberry雪糕俾Ball令佢開心番

不過Ball都仲係好呆滯..

要戒口之餘仲唔可以游水, 做激烈動作

仲要再覆診同安排拆線

真係要幾擔心有幾擔心

6月12日 (Day2)

Ball話個傷口唔痛

不過夜晚發噩夢, 大叫唔好"禁"住佢個頭

好驚好驚咁, 喊左好耐, 心痛!!

6月13日 (Day3) 

覆診, 傷口ok, 要繼續日日換紗布,等拆線

6月15日 (Day5)

今早就唔用紗布等個傷口乾d, 埋口好d

不過Ball好似已經忘記傷痛, 又開始亂黎

養兒100歲, 長憂99, 唉!!!

下星期二, 拆線, 諗起都驚!!

車手

自從唔知幾時帶過Ball去carshow / showroom

參觀車展車行呢個活動

成為Ball的最愛

既然"假的真不了"

要睇要試一定係揀真車!

阿媽我都訓練到好厚面皮

就連平時人煙罕至的McLaren

我都會帶個囝去"感受吓"

1號車手同戰車出場

細路仔好就係可以扮唔知唔理規舉

Ball一見車, 咩欄咩繩都唔埋就衝埋去

又睇又摸, 過足癮!

又係嗰句, 有得玩咪玩囉, 

只要唔太過份, 阿媽幾時都ok o家!

影俾爸爸睇

依家因為要就Ball的返學時間

爸爸的親子時間好多時都得番"零" 

因此我發明了"影俾爸爸睇"

好多時Ball知道又係"影俾爸爸睇"環節

佢會合作d, 望吓個鏡頭

不過有時知道我影佢唔好既野

佢會好迴避,知道去到爸爸度會好大件事

所以"影俾爸爸睇"都好有警剔作用

相比佢其他較狂野的photoshoot

以下係佢"影俾爸爸睇", "留個好印象"的正經相

不過有時佢好似好醒

會先問"影俾邊個睇", 以免交錯戲 @.@

懂事

經歷了新工人姐姐一役

我不得不講句, 其實Ball好生性好懂事

話說工人姐姐語言不通, 中英都唔得, 仲要係張白紙

我同爸爸都講到頭大

Ball今早親身示範無障礙溝通

一大早5點幾, 唔知係唔係工人姐姐瞓唔著

晨咁早就起身, 又做嘢又呢樣嗰樣

Ball又一齊起埋身, 一個人坐响廳, 冇話瞓唔醒發脾氣

之後仲同工人姐姐玩Lego

(Ball之前一晚好介意個姐姐唔應佢

其實工人姐姐都唔知Ball叫緊佢..唉!

而佢亦唔明點解工人姐姐唔知咩叫Lego

我同佢講工人姐姐唔知Ball有咩玩具

所以唔知點玩, 我想Ball可以教吓姐姐, 同佢一齊玩) 

今早Ball就大哥哥上身, 要教姐姐玩

初初Ball都一直用廣東話叫姐姐砌嘢

不過見姐姐冇反應

佢開始用手語, 要佢放lego喺呢度嗰度

放錯位就"NO", 啱就"YES"

好有心機教佢玩, 話俾姐姐知d車點行點泊

我覺得2歲半可以咁有耐性, 咁細心係好唔容易

而佢自己仲示範大人可以點幫佢wee wee, 同邊度攞褲仔換

(姐姐拖住佢去廁所, 佢仲俾個好開心樣我!!) 

我真係好好好感動!! 佢冇"嫌"姐姐唔識點玩唔知點照顧佢

仲好開心成日都叫姐姐, 問人叫咩名

出門口, 仲同姐姐講3次 "我晏d會返黎呀! see you later" 

然後問我"返屋企會唔會都見到姐姐!! 

(有一刻我覺得好似對Ball唔住, 

都唔知個姐姐係唔係鐘意佢..) 

不過點都好, 都係一個重要的成長過程, 

要學點同唔同人溝通, 阿囝就好明顯叻過我.. 

我就見到個姐姐有語言障礙灰心沮喪, 

仲擔心左成晚瞓唔著呀!只可以講句: 

..希望在明天..

God Bless Me!!!