與兒子的對話

成日想學大人講嘢，笑死人

(1)

仔：媽媽同我講故事呀

媽媽：我要整妹妹d嘢食，唔得閒住呀

仔：吓，你唔係咁誇張呀？

（有咩咁誇張呢？）

(2)

媽：你今晚想食咩呀？

仔：雞鎚呀，雞鎚多d肉呀

媽：啊，係咩？咁你想食咩味呀？

仔：就呢個味囉 （指洋蔥薯仔炆), 呢個味好呀

（收到。。）

(3) 

一入𨋢，仔即掩鼻

媽：你個鼻唔舒服呀？

仔：後面個叔叔好臭呀

媽（極尷尬）：唔可以咁冇禮貌呀

仔：咁後面個叔叔真係好臭呀

（即時想搵窿捐）

／／

同一情形，有次入𨋢

見有人入𨋢，仔即手指指：

(大聲mode) 點解呢個人咁瘦呀？

（吓？瘦都唔得？仲咁冇禮貌！）

(4)

仔：我呢最鐘意閃電王麥昆

媽：冇呢個人，得lightning mcqueen啦

仔：有呀，阿XXX話佢都最鐘意閃電王麥昆

媽：咁你鐘唔鐘意lightning mcqueen?

仔：唔，我鐘意閃電王麥昆同lightning mcqueen

(5)

仔：媽媽，我想換張新床

媽：你張床係新𠺢喎

仔：但都唔係閃電王麥昆，唔靚喎

媽：你話床單呀？下學期先啦

仔：要閃電王麥昆，依家嗰張唔靚呀

（6)

媽：新買既閃電王麥昆牙膏好唔好用呀？

仔：好呀

媽：係咩味呀？士多啤利？橙？

仔：唔係呀，係Mcqueen味 

（因為個牙膏上面冇水果圖案，但Mcqueen

媽：係唔係鐵味呀？

仔：係呀，係鐵味，係Mcqueen味

妹妹成長日誌 － 7個月

(估計)身長：65cm ／ 體重：15磅 （細細粒）

飲食：名牌媽媽奶 ＋米糊仔

食量：2固5奶 （午餐晚餐糊仔，6個月開始食純米糊，
食得好2個星期就開始加蔬菜，
有粟米，蘿蔔，節瓜，番薯，菜心，薯仔，南瓜
上星期開始加蛋黃，魚或肉汁）
奶就4個鐘1次，1次夜奶（約5:30m) 
唔鐘意飲水

片：中碼

玩：可以坐得好直，會雙手攞住玩具，都可自己玩，會同哥哥爭
可以雙手扶住企，仲邊企邊揀玩具！
會爬，特別係見到鐘意既玩具／搖控
鐘意游水，第一次少少驚之外都ok! 

口腔期：咩都會用口試，最鐘意食手指（特別係眼瞓時），會揀牙膠

溝通：會"唔唔唔"講嘢；知道自己個名，人地叫佢會望住叫佢既人；

有時會發出好似"ba", "ma", "por"咁既聲

成日笑，依家好少喊（除左佢想你抱你唔抱時）

鐘意音樂，特別係ABC Song同哥哥唱歌
哥哥係佢偶像，哥哥做咩佢都好開心
爸爸就係佢最佳情人，見到爸爸就好嗲，成日要爸爸抱

成長：新生既頭髮都算濃密但仍然都係好少

仲未見到牙的踪影，但就時時好牙痕

成個人轉嚟轉去，由床頭轉到床尾唔駛幾秒，爬都好快，手腳協調都幾好
可以定定自己坐highchair食飯，但食完就要即刻落地

可以俾陌生人抱，好social, 鐘意撩人玩，要人同佢講嘢

比哥哥仲貪玩，仲係要玩刺激嘢

與兒子的對話

阿仔越大講嘢越"叻"

都唔知係好嬲定係好笑

又有怪事年一堆。。。

（1)

媽：做咩碌左成半個鐘都唔瞓呀？仲瞓到"咩"哂

仔：哦，係呀，因為我個pat pat郁嚟郁去嘛

媽：所以你就要一齊郁咩？

仔：係呀。。。

我唔鐘意瞓枕頭 （刻意把頭屈在枕頭範圍外）

我唔鐘意瞓中間，鐘意側邊（可以避開張被）

然後繼續碌，唔瞓！

（吹漲）

(2)

媽：你快d飲埋d奶啦，唔係冇星星啦

仔：我唔飲啦，個tummy好飽啦

媽：咁你今日會少一粒星星喎

仔：唔緊要啦，我唔飲啦，唔要星星啦

（吹漲 － 成日都話"唔緊要啦"，

油顏色唔靚咩 － "唔緊要啦"

畫線唔直咩 － "唔緊要啦"

今日唔乖冇貼紙咩 － "唔緊要啦"

有冇搞錯！！！）

（3)

阿仔好鐘意學人講嘢

揸車中，阿仔忽然話：痴線，前面架車阻住哂！（老豆的語氣）

朝早換校服中，發現校服小手拍冇熨

阿仔話：姐姐真係一個垃圾人 （我的語氣）

（弊，都唔知會唔會喺學校亂講嘢！）

好想知道，係唔係個個3歲幾都係咁？

定係我個仔實在太特別！？！

恐龍熱

小朋友界近日掀起一股恐龍熱

之前朋友送的恐龍sticker book

聖誕節Ball收到聖誕老人送既恐龍蛋及火山恐龍

再去埋朋友仔屋企玩過恐龍後

恐龍就一直冇離開過我地屋企

為預備星期六去科學館睇恐龍

我地開始講多d有關恐龍既嘢俾佢知

膽小如鼠的Ball擘頭就問：恐龍食咩㗎？

爸：食肉！

媽：食小朋友

爸：咁咪就係食葉天峰d肉囉！

Ball：唔係呀，係豆腐入面嗰d肉呀！（指豬肉）

爸：人食豬，恐龍食人呀，恐龍唔食豬呀

你成身都係肉，就食呢d肉囉！

Ball：唔係呀，係食豬啦，唔食人啦！

爸：恐龍淨係食人啦！！

Ball：咁我唔去睇恐龍啦。。。

（不過佢又唔想自己一個對住姐姐，所以最後都係話去）

聽講外國既小朋友好細個已經可以認哂所有恐龍

仲知道哂d名

Ball到依家連T－Rex都未知係咩

睇恐龍，其實只係俾機會佢扮Monster

ROAR～～～～！！

補充：恐龍除左要食人，仲要飲水

圖中所見，Ball俾左好大杯水隻恐龍 

（Ball自己就飲Juice）

與兒子的對話

今早6:45, 個仔同我講：

"媽咪，我決定買樣禮物送俾你！"

"啊！咁好！你打算買咩俾我呢？"

"我想買個新煲俾你呀！"

"吓？點解呢？"

"呢，上次你整年糕嗰時咪痴住哂個煲既，

咁我咪想送個新煲俾你囉" 

"邊個煲呀？有痴住哂咩？"

"呢呢呢，上次你整年糕嗰時咪痴住哂個煲既，嗰個煲呀"

"係喎，咁好呀，多謝你喎"

（其實都冇件咁既事，不過有人送新煲，梗係好啦，哈哈！）

"咁你有冇發夢呀？瞓得好唔好呀？"

"媽媽，我尋晚見到爺爺屋企架車呀"

"係？"

"係呀，架車係Mitsubishi, 有個Mitsubishi logo 喺前面"

"架車好似唔係Mitsubishi呀！"

"係啦，你都唔知。。（下刪對Mitsubishi的評價）

爸爸都有話，呢個年紀既小朋友

想像力無限

好多時都會將佢自己想像既嘢當真

之所以有時Ball都會講d好似係日常既嘢

但又未必係真係有發生過既

佢次次同我講，我次次都當真既咁答佢

等呢個"故事"好似越煲越大，越黎越真

有時大人細路講完都笑到痴線！

想像想像，就會有想像力啦！哈哈！（我諗）

差3歲的好處

～差3歲的好處～

仲未有共同喜好 唔會打交爭玩具 大人煩少好多

哥哥已獨立 可以照顧自己同學照顧妹妹

妹妹只係學認住哥哥 

同哥哥笑哥哥就lum哂 相親相愛

咩都叫妹妹要學哥哥 

哥哥自信心返哂黎之餘 仲會乖d做好榜樣

雖然未要真係share 但日日講

潛移默化到要share希望就唔會太難

3年都唔算好耐 好多嘢重用都仲ok

大既過左trouble 2已經好好多 

到妹妹trouble 2 哥哥已5歲 應該會就到個妹 幫輕下

（暫時見到係咁多。。哈哈。。自我開解）

 

妙問妙答

大個仔，講嘢越黎越古怪

（1)

Ball: 阿婆呀

婆：咩事呀

Ball: 你幾時生個baby俾我呀，我好鐘意Baby㗎

婆：你屋企咪有囉，你妹妹呀

Ball：係喎，我好錫妹妹呀

(2)

Ma: Edison, 要熄機啦，唔好玩咁耐啦，

唔乖乖熄機下次冇得玩呀

Ball：我下次唔玩啦，今次玩耐d

Ma: 。。。

(3) 

Ball: 我淨係話俾你知呀

Ma：咩事呢？

Ball：我整爛左學校個哈姆太郎，

不過冇同老師講，淨係話俾你知呀

Ma：吓？？

（4）

Ma：今日學校飲咩湯呀？

Ball：唔知呀

Ma：橙色？白色？紅色？啡色？

Ball：咯係呀，冇色呀

Ma：個湯有咩呀？有冇肉呀？瓜呀？菜呀？

Ball：冇呀

Ma：咁即係飲水？

Ball：唔係呀，湯呀！

（5)

Ma：快d食飯啦，好細碗飯之嘛

Ball：我好飽呀

Ma：咁你學校又要添飯？

Ball：學校碗飯好細嘛

Ma：。。。 (即係點）

（6)

Ball：今日好眼瞓呀，未瞓醒呀

Ma：都要起身返學呀

Ball：唔起身呀

Ma：咁爸爸返工唔車你啦 你自己搭巴士啦

Ball：。。。好呀

Ma：（怒）快d起身呀～～～

Ball：咁我喺爸爸車車繼續瞓啦 

（然後成個人掛在床邊 唔郁）

（7)

Ma：都話冇片啦，仲痾濕片！！

Ball：咁我真係好急嘛。。

Ma：好急就落床去廁所呀，好啦，冇片用啦

Ball：。。。

咁晾乾呢條再用啦，冇辦法啦

Ma：。。。

太多未能盡錄 問你死未 

妹妹成長日誌 － 4個月

(估計)身長：61cm ／ 體重：14磅 （50%生長線）

飲食：名牌媽媽奶

食量：想食就食，日間3·5－4小時一餐；

自己戒夜奶中，可以6個或以上一餐

（瞓覺pattern都未好穩定）

片：細碼

玩：會嘗試去伸手抓面前的玩具，

口腔期：咩都會用口試，最鐘意食手指（手指公及食指最好味）

有鐘意既牙膠，會咬紗巾

溝通：會"唔唔唔"講嘢；知道人地叫佢，會望住叫佢既人；

人地講嘢會出聲答咀；

食飽會"唔唔唔"推開你示意唔要食，有時仲好大聲好似要鬧走你咁；

成日笑，但要喊亦可以好大聲好突然

鐘意音樂，特別係ABC Song

成長：仍然在更換BB毛，洗完頭會甩好多毛毛，新生既頭髮都算濃密

狂流口水，但仲未見到牙的踪影

成功轉身，仲上左癮，一瞓低就轉，但唔識轉番轉頭

會認人，陌生人一抱就大喊，就算係抱住同我玩都唔得

換片會扭得好勁，仲可能會突然轉身

呢2日仲開始bu口水，時時都成口波波

打人？

話說今日老師放學時話俾我地知Edison喺學校打人！

按老師所講，件事在未上堂之前發生

個同學喊住話Edison打佢，個臉仲有5個手指印

（到放學都散唔哂，仲有一粒）

老師問Edison發生咩事，佢就又喊哂話自己唔小心

咁成件事就自然變成Edison打同學！！

我諗極唔明，個仔有時係會癲喪係會惡

但絕對絕對唔會郁手打人

同佢出去玩10次有10次都係佢俾人恰

次次都係人地出手佢出口（講道理）

心諗等佢冷靜落嚟就問佢成件事既經過

好啦，終於等到佢返屋企，想問佢之際，發現個仔好攰咁樣

死啦，可能已經俾人問到"心力交瘁"，慘豬呀

之後爸爸同我講，佢話阿仔話佢知

其實係攞玩具時隻手唔小心打到個同學

但"無情力"係真係好大力，所以同學仔個臉就有手指印

佢之後有hug hug個同學仔和好

哦，咁呀，我就再提阿仔唔係淨係突登打人先至唔啱 

唔小心傷害到人都係唔好

佢嘻嘻哈哈話知道 我地就冇再提呢件事啦

呢件打手事件既"真相"雖然我地未必會知

但我覺得任何時候我都應該相信個仔 

佢同得我講我就應該信佢

我明天打算先同老師解釋多一次 再同同學仔道歉 了決件事

看似係好事一樁 但我明白到有事情發生時

爸媽對囝囡既信任好重要 令小朋友知道我地相信佢既說話

佢地先會願意把心事同我地分享

就算真係做錯事 都唔係一劈頭未攪清楚就鬧左先

幾時都係小小心靈比父母面子重要得多 

大庭廣眾當住老師同學鬧左先不一定能解決問題 

但一定影嚮到小朋友的自專心 補唔留呀！！

＊＊＊

我真心真心相信 我個仔係唔會打人的

因為佢係一個好善良既小朋友！

性教育是咁的？

依家d細路原來2,3歲已經會問以下問題：

1) 點解女仔要坐度wee wee?

2) 女仔有冇啫啫仔呀？

3) 女仔個啫啫仔係唔係喺後面呀所以要坐度wee wee？

4) 點解媽媽呢度（即胸部）可以餵奶俾baby?

5) 點解媽媽呢度會有奶奶呀？點樣裝住d奶呀？

6) 點解媽媽呢度會凸起，咁女孩子點解冇呀？

7) 男仔點解冇baby?

8) 阿婆tummy入面有冇baby呀？點解冇呀？

有時仲要喺公眾場合大大聲聲問！

可以話佢係觀察力強又得，凡事好奇又得

不過老實說第一次被到呢d問題都有d突然

但最後都係當一般問題，如實回答

唔想好似煞有介事，尷尷尬尬

費事等佢知d唔知d，心思思，以為係咩天大秘密

應對細路問題，真係要腦筋急轉彎！

妙問妙答

Ma: Edison, 你2014年有咩新願望呀？有咩想做好呀？

Ball: 我想放假呀，同埋長高

（之後就重覆：2014年唔駛返學呀。。。長高呀）

Ma: 你揸緊咩車呀？

Ball: 我架Previa揸左好多年揸左好耐啦，要換啦

（好多年？）

Ma: 你做咩成日都要整呢架車呀？壞左邊度呀？

Ball: 係呀，要整呀，咁要整就要整好為止㗎嘛，係咪？

Ma: 我叫你坐好做咩你又要走嚟走去呀？

Ball: 咁我要企係度同媽媽講嘢嘛，係唔係呀？

Ma: 你今日都唔乖點解會要食Candy呀？

Ball: 我頭先自己行路呀，好乖呀

（自己行路係乖既一種？）

Ma: 你收好d玩具先啦

Ball: 我唔要啦，因為玩左太耐啦，俾其他小朋友玩啦

（佢好想捐哂所有玩具換新嘢）

Ma: 快d起身啦，要返學啦！

Ball: 我未瞓醒呀，我今晚返黎要即刻瞓覺先得啦

（之後夜晚又唔想瞓。。）