結婚？

話說Ball有日到朋友仔屋企playdate

3個小朋友一齊玩

玩到差唔多要走，朋友K（女仔）唔捨得Ball

K: Edison 你唔好走啦，今晚喺度瞓呀？

K哥哥：Edison喺度瞓, 咁你瞓邊呀？

你要俾張床佢瞓，你冇位瞓啦！

K: 咁我地一齊瞓啦！

K哥哥：咁唔得呀，唔可以呀，不如你地結婚啦

Ball都唔知咩事，拜拜！頭也不回返屋企，哈哈！

小朋友對話真係好天真！

妹妹成長日誌 － 9週

轉眼又已經9星期大

成個人長左又重左

身長：58cm ／ 體重：11.6磅 （50%生長線）

飲食：名牌媽媽奶

食量：想食就食，餐餐放題 (日間3小時一餐，夜間4-5小時一餐，最長6小時）
時時食到瞓哂
片：細碼

玩：有聲玩具如搖鈴，馬鈴等，食手，玩口水（我時時都認為佢係出牙！）

溝通：會"唔唔唔"講嘢, 會扁咀，會皺眉頭，會笑（仲笑出聲）
睡眠：自上星期開始晚醒1次，12/10日更可以一覺瞓天光（12至6）
自己一個瞓唔駛人陪，有時瞓醒會自己玩，不一定會即刻喊！
技能：鐘意坐（可以坐bumble chair), 會扮請請（其實食手), 對眼最叻搵電視睇
另爸聲稱有一天妹妹叫了一聲"ba"

兄妹：哥哥日日都會kiss kiss妹妹，
會幫手攞紗巾摺紗巾，會唱歌俾妹妹聽，會唔妹妹食手
會幫手搖妹妹combi床，妹妹瞓左會細聲玩
（相親相愛！？哈哈）

3歲講嘢篇

（時下流行Selfies，哈哈！）

3歲人仔，學大人講嘢，好搞笑！

有次講開洗車，佢話：

「咦，舅父架車成日都唔揸，咪會黑咪咪囉！」

佢見車嘅死氣喉，會話：

「咦，呢架車有臭氣／黑煙bor!」

有時候佢自己發脾氣，大叫大嚷，佢會話:「我發癲啦！」

叫佢起身，佢懶床，佢會話：

「我好攰呀我唔起身啦，我唔返學啦好攰呀！」

好想要一樣嘢，會lur, 話：

「我都好想要㗎嘛，我都想依家要bor...」(重覆10次)

問佢想唔想睇卡通，佢會話:「睇新聞啦！」

爸爸問佢有冇掛住媽媽，佢話「有呀！」
爸爸再問佢有冇掛住爸爸，佢話「冇呀，因為你喺度呀」
同佢講英文，佢會大陸人上身,「唔講呢d, 講中文啦！」
俾嘢佢食，好叻"刷鞋", 佢會話:「我最鐘意食呢個㗎啦！」
電視有國歌, 我地會mute左
佢會話：「有中國旗呀！爸爸唔聽呀！」

講佢d同學仲好笑

「佢成日都喊㗎啦，要媽媽呀，要姐姐咁呀．．成日都係咁呀」

「佢喺屋企睇好多電視呀，成日都睇電視，所以要戴眼鏡囉！」
「係呀，返學有見到佢呀，佢話要拖住，我唔拖呀！」
「老師今日好忙，又要（照顧）小朋友，又要做嘢，烏龍咗，
都唔記得左俾good boy stamp」

電台節目，廣告（連歌曲), 大人對話
一聽即記得，仲學埋有時講一兩句嚇你一驚
「阿姐都話正！」「愛的咕哩」「愛回家主題曲」
依家我講嘢都要好小心！！

齊慶賀 同歡欣

雖則小朋友生日冇必要大攪
但對我嚟講，3歲係大生日
因此係有需要隆重其事既，哈哈！

先黎一個開心麥叔叔生日會，請來20多個小朋友一齊慶祝

（注意： Ball唔係麥叔叔粉絲

這乃是Ball人生第一次麥當當經驗！）

爸爸訂了個吹氣跑車
壽星仔開心到見牙唔見眼！

（因為太多小朋友又要玩又要食，冇咩影到相，好快就飛到蛋糕時間）

特別鳴謝各方好友友情拍照，我地真係一張相都冇機會影 :*(

個 McQueen蛋糕係我特別訂既，朱古力底，好睇又好食

之後安排壽星仔派禮物仔俾小朋友，人人有份

同時仲收到好多個"Happy Birthday"祝福"呢

開心既仲有我同爸爸，因為有難得的全家幅！

生日會後例必要同禮物來個大合照
感謝各位Auntie Uncle 的慷慨支持
今年禮物同一歲生日比較陣容依然強勁

(今年）

(2011年）

大個仔啦，收到好多益智圖書，連我同爸爸都好鐘意！
連埋玩具，夠佢消磨一年 （？！）

至於狂歡過後，11月13日正日生日當然係一家人過
地點係壽星仔最鐘意既Football Club
今日特別d所以我自己去接放學，等埋爸爸放工
一家四口食個簡單飯，舉杯暢飲，嚟個生日蛋糕再玩轉Playroom
嘻嘻哈哈嘩嘩嘩左一晚
老土講句，一家人齊齊整整就最開心

是晚忽然好想抱起個仔影張相

對比一年前佢仲係好BB樣，依家有多左d大個仔feel

所以話細路就係最有效證明光陰似箭 （好彩我好似唔係老左好多）

＊＊決定年年影一張 俾阿媽我留個念＊＊

3歲啦！

按現今醫學，人生應該有廿幾三十個「3歲」

但係，永遠第一個「3歲」先會寧舍難忘 （特別係從父母角度）

由24'腰到39'巨肚咇出一個小baby再到25'

由一舊飯，由瞓到會爬會坐到企，到出牙食糊仔

到走黎走去，然後跑黎跑去，跳黎跳去

由呀呀呀，到叫爸叫媽，由單字到句子

由你好恨佢唱歌仔陪你傾計，到開始覺得佢好嘈
再到佢要返playgroups, 學游水, 到返summer school，到返PN, K1

一切一切，都是父母嘔心瀝血，棉乾絮濕，捱熊貓眼捱出黎既成果

Ball的出現，可謂是一個改變我一生的意外

由唔知點做阿媽到一個白痴媽媽到2個孩子的媽

還記得當日(2010/11/13)聖保祿醫院的每一個畫面

特別係那一晚第一次見到囝囝 （先知原來Newborn係咁樣
仲即刻改左'Ball"呢個乳名

而往後Ball便是每天每天給我 '驚' '喜'

不但讓我把人生從頭活一次

把我和孩子的爸更緊密拉在一起，

亦令我彷如回到做女的時候，日日有爸媽照顧

再者，唔係因為Ball, 我好多兒歌都唔記得點唱啦

童話故事呀唐詩呀都只係記得個開頭

久遺了的玩玩玩具，食支lollipop, 跑跑跳跳都可以好開心的日子

公園呀沙灘呀十年都唔去，依家時時搵機會要去
屋企最多係玩具，DVD都係卡通片為主，個廳貼滿勞作通告
開口埋口都係細路，學校，星期六日去邊度玩，邊度kids friendly

養一個細路真係有血有汗有笑有淚 死左好多細胞血壓高左幾度

仲多左一條大到唔恨既開刀疤痕

但仍然感謝這小魔怪3年來給我生活上的種種

一篇半篇blog都實在無法將我的感受完全表達

"非筆墨能形容"就係咁既意思啦

來到今天，希望你3歲生日快樂，日日開心健康

媽媽永遠永遠愛你

"HAPPY BIRTHDAY"

妙問妙答

(1)

Ball: 媽媽，我要poo poo呀

Ma: 今日咪去左囉，食埋飯先啦

Ball: 媽，唔得啦，我要poo poo啦 （辛苦狀）

Ma: 好啦，咁你去啦

（一大輪之後）

Ma: 得未呀？有冇講假冇得痾呀？

Ball: 得細細粒咋

Ma: 咁你即係講假啦

Ball: 好細粒都係屎黎0家！

（又係喎。。）

(2)
Ma: 你同學XXX今日仲有冇喊呀？
Ball: 有呀，佢成日都喊𠺢啦！
即扮：我要姐姐呀～～我要媽咪呀～～（慘聲慘樣）
Ma: 咁你做咩呀？有冇叫佢唔好喊呀？
Ball: 我睇（望）住佢囉！

(3)
Ma: 今日X老師有冇返呀？
Ball: 有呀，不過佢一早走左
Ma: 係？咁佢有冇話要去邊呀？
Ball: (好細聲) 係秘密呀
Ma: 咁神秘？？
Ball: 呢，佢去左買奶奶之嘛 （有時就去左football club等等）
＊正一吹水怪＊

(4)
Ma: 嘩，你排左咁多架車，佢地要去邊呀？
Ball: 佢地要返工呀
Ma: 啊！係呀，咁多人要返工呀！
Ball: 係呀，佢地要去台灣呀
（台灣？？佢知台灣係咩𠺢？）

(5)
Ma: 你d新玩具冇位擺啦！成個櫃都裝滿哂！
Ball: 個櫃0個d全部唔要啦，咁就有位啦
（衰仔，唔再買俾你！！
有時人地送禮物俾佢，佢會係咪都話："我有啦"，好鬼尷尬！）

妹妹成長日誌 － 1.5個月

我家小公主正式於2013年9月28日到地球報到

身長：50cm

體重：3.545公斤 （即7.8磅）

特徵：幸好沒有什麼斑／痣等特徵，手長腳長，瓜子口面

性格：惡，唔餓得，要人陪（鐘意有人同佢講嘢）

鐘意瞓覺 (要人抱住），對音樂有興趣

食：全人奶 (先係1.5-2個鐘一餐，依家2.5-3個鐘一餐，好準時）

日夜都差唔多食得咁密（好似話要幾個月先可以拖長）

技能：眼睛會track到有人行左行右，對音樂有反應，
聞到我既奶味會好瘋狂，巨肺（喊得好大聲之餘仲好長氣）

陀妹妹都真係驚心動魄，一早就腰痛唔在講
先係Oscar Test唔past，仲話係唐氏高危，
要做Nifty（好快有結果但係要等都係想死）
Nifty醫生又話做結構見到古怪嘢，話從來都冇見過但又冇得擔心
（到今日我都唔知係咩 '古怪嘢'）
之後又話阿b size細，俾醫生話我太操勞令阿b唔長肉
要密集式食同瞓，仲要成日上磅check住
到後黎又話佢唔掉頭，又要怕佢會臍帶纏頸
就黎生得忽然好肚痛以為生，原來係詐糊，日日聽胎心機聽到怕
總之就係日驚夜驚，日日望可以快d40週生得
出世啦，冇事冇幹，滿月又俾健康院話佢太黃唔正常，要去瑪麗抽血
急急同佢睇私家又話冇黃好正常咩都唔駛做。。

依家妹妹已經差唔多6週大，平安健康
所有所有都得來不易，的確十分感恩
願妹妹快樂成長，咁媽媽所有的擔心都值得呢 ：）

真的長大了

忽然發現，囝囝真的長大了

從前在公園玩，很多時都要人從旁協助，

依家自己玩之餘，站在搖搖木馬邊阿囝好似已經大隻過個佢

（係似會壓死隻動物咁！）

不單係身體大左幾個碼，成個人的言行舉指都大個左好多

知道我忙住要照顧妹妹，佢話可以自己玩住等我

好多自己做到既嘢都會自己做，幫輕吓我（係有時好呢hea)

我教佢依家要多d體諒人（包括我，爸爸同妹妹）

例如唔好玩有音樂既玩具，講嘢要細細聲，

佢又好似明白，會盡量配合

不過始終都係3歲唔夠，係會有小朋友脾氣同會呷醋

不過諗諗吓都係可接受範圍，其實已經好叻仔啦！

相反有時大人唔夠瞓，見佢少少唔乖就會好惡，

會對佢有多左“乖”既要求，依家諗落係我地冇體諒個仔！唉！

屋企多左個人個個都要時間適應

希望好快安定左之後

大人唔駛忙到痴線，細路又開開心心

一家四口可以樂也融融

今日Papa同佢出去威，又玩又食，你睇佢幾得戚！

妙問妙答之妙語連珠

(1)
Ball的新詩：

食多d飯，長～高～

飲多d奶，長～高～

瞓多d覺，長～高！！

（在爸爸成日話要長高d的壓力下的完美創作
日日食嘢都要講嚟催眠自己）

(2)

我剪完頭髮返屋企

Ball: 媽媽個頭做咩剪成咁㗎? o係邊度剪㗎？
然後失控大笑。。。

（我只係剪短左啫，做咩咁大反應？）

(3)
Pa: 爸爸要去wee wee, 你去唔去呀？
Ball: 我唔去呀！
Pa: 但爸爸想你陪我去呀
Ball: 好呀，我帶你去呀！
[到達廁所門口]
Ball: 到啦 （走開，然後轉頭話：拜拜）
吹漲！！

(3.1)
Pa:咁不如你都等埋我先返去啦
wee wee之際都問句：仔，咁你要唔要wee wee啫？
Ball: 其實。。我都要呀！

(4)
一大清早
Ball見爸爸返左工，屋企好似冇咩人
問：媽媽，點解我地冇屋企人既？
Ma: 吓？我咪係你屋企人囉
Ball: 咁我d屋企人去左邊呀？點解冇屋企人呀？
（即刻要打俾阿婆，問屋企人去左邊）
Ball: 阿婆，點解我地冇屋企人既？屋企人去左邊呀？
。。。。。

愛畫的孩子

Ball問最近很喜歡畫畫

而且畫下畫下好似都有進步

今朝又畫左幾樣嘢， 都有紋有路

（1）

唔係ET,而係Ball眼中的Happy Face

有眼，鼻同口，因為佢時時都畫circle,所以所有器官都係圓既

（2）

爸爸car car - 7人車，都幾似呀，不過佢話呢架係冇窗既

（3）

limousine - 呢架係長車，有窗，仲可以見到有carseat, 

不過又係樣樣都係圓既，好攪笑！

爸爸獨具慧眼，一早設計左個磁石牆用嚟幫ball貼堂 （鼓掌)

依家已經有一大堆，都係summer school時畫既

其實佢每一幅畫我都有keep, 大左就畫唔番𠴱種‘稚氣’

真係幅幅都唔捨得掉呀

Ball的成長日誌 - 33個月

33個月大，很多肢體技巧都有進步，講嘢同表達自己都醒左好多！
（唯一冇變過就係 ﹣仍然係超級車迷）

身高： 91cm (50% 線左右）
體重：32磅 （超90﹪線）

戒片：日頭完全唔駛片，但瞓覺仲未戒到，有時小睡1﹣2個鐘都會濕片

自理能力：
1。已經可以自己完成整個wee-wee過程（搬櫈仔，除褲，wee-wee, 著褲，洗手)
2。會執少少床（擺好公仔，攬枕同枕頭）
3。會自己刷牙，少少lea hea，要大人補刷
4。會自己除衫準備沖涼，會自己捽泡泡
5。所有玩具自己執，玩完一樣先玩下一樣
6。會自己食飯（當然要剪細先俾佢，仲要整細細碗）
7。會自己用水杯飲水飲奶 （有時會有意外）
8。會自己抹面抹手

肢體技巧：
1。一個人自己在playroom爬上上層玩，仲可以上上落落冇難度
2。自己搬大積木自己砌，可疊好高都唔跌
3。可以跑好遠唔跌，仲跑得幾快
4。連續雙腳原地跳幾下
5。自己扶住上落樓梯，落樓梯拍得住大人咁快
6。會手心向下掉波波，接波就麻麻地
7。自己上落床，可用手支撐身體上落
8。會自己踏單車 （名牌BMX呀, 加輔助碌x2), 練緊用hand-brake

食量：
早餐 ﹣ 一大杯奶＋三文治／蛋糕；
午餐：通粉／意粉／餃子5隻；Tea: 水果一碗
晚餐：一碗飯，半碗肉／蛋，半碗菜 （再加甜品）

Breakthrough:
1。識幫爸爸媽媽影相，個人會在相的正中間，直既
2。會主動同的士叔叔打招呼同拜拜
3。會回答人地問佢既嘢，會關心別人 （知人地唔舒服會問人o唔ok!)
4。會畫車車 （如圖示），油顏色冇咁多出界

First Movie Date

Ball的第一次Movie Date

於剛過去的週日發生了

套戲係“Monster University"

還以為3歲唔夠的小人兒會怕黑麻麻的戲院

會怕嘈吵的音響同特大螢幕

會坐3分鐘就要走，或者要我抱出抱入

但原來小人兒的應變力及耐性遠超過我想像

一包Popcorn一支水一個booster一套卡通

小人兒就乖乖坐了差唔多2個鐘！！

全程留心，又跟住笑，好似真係明個卡通講咩

（中間係有去2次廁所，不過都可以理解）

中間我仲出左去2分鐘打電話

佢好似都只係叫左幾聲媽媽之後又冇嘢

又係𠴱句，與其因為擔心佢做唔到

不如俾佢試左先，就算唔得都知道其實佢做到幾多

（最好笑係，佢之後一路話好鐘意睇movie

同好鐘意食popcorn，又成日扮怪獸叫

完全上哂腦！！）

如何轉channel??

近日一直都為轉channel而頭痛

指的不是我，而是3歲未夠的小人兒

之前一直有指小朋友面對大量語言衝擊會令佢地抗拒講嘢

所以從小我們一家人，姐姐等都係用廣東話同ball溝通

只係會間中同佢讀英文故事書，

開英文dvd或上簡單playgroups俾佢接觸下英文

好啦，依家冇語言障礙，講嘢仲好鬼叻

但即刻又出現另一個問題，英～～文～～！

首先係全英文summer school， 令佢喊左成個禮拜

我就知道佢既英文真係。。。

跟住新姐姐又要係全英文，一個中文字都唔識

忽然要轉channel （或加一個channel)

阿囝暫時都係用“不變應萬變”呢個上策

即9成時間都堅持用中文，只係大聲d去“強烈表達”佢既意思

我知佢好多時都係聽得明人地講既英文，但佢自己開口就係中文

好似好難改咁，叫佢跟我用英文講多次佢又唔係好想

已經時時提佢“English please"

但佢就真係學左"English please"呢句，激死

同埋NO, Please, Thank You 呢d‘行嘢’

尋日多左句"Wait for me"，完全就係有限公司

可以點樣鼓勵佢再講多d英文呢或者會用英文表達自己？

正一問題天天都多！ 頭痛呀～～～

兩母子相依為命的日子

一直沒有想過可以“有幸”體會全職媽媽這份工

原來真係百般滋味

樂：

可以全日對住個仔，相比打工仔爸爸，係無比幸福

由佢起身一刻開始，所有生活所需都係我為囝囝安排

食瞓玩痾都有時序 （個仔又有自己要求）

執頭執尾呀，清場呀，基本上所有大小事都係一力承擔

少d精力都應付唔到

有時小朋友情緒唔好，發下脾氣攪下破壞

要教仔之餘，又係有一大堆手尾要跟，正一好過做gym

仲因為對住佢耐，好多平時冇為意到既性格同習慣等

都一一浮現，俾我多左機會了解個仔多d

再者幾時都話小朋友易跟人

依家佢時時見住我，好自然有咩事都會搵我

媽媽的成功感同“虛榮感”返哂黎，自我形象即時提升

苦：

因為係相依為命，所以除左自己幫自己，最後就都係自己

冇人可以即時提供援手，有時真係會攰到喊

因為冇人支援，想偷閒基本上是完全不可能，完全冇私人時間

只可以0係佢瞓晏覺時有1﹣2個鐘做下自己嘢

佢一起身又要放下一切陪君子

自全職媽媽以來，一杯starbucks都冇時間飲過～

連朋友都係見過1﹣2次

而細路既激氣嘢又會攪到自己心情差

成日有‘要教但又唔知點教’既矛盾心情，成個𤷪薑哂！！
仲要自己個人又有要求，成日都keep住有家務要做，東攪西攪

每日送左個仔去瞓，自己攤上床就知成個人散哂，一早就要瞓

果真係身心疲累

有時都會諗係唔係返工會好d呢？
傻既！敬業樂業，還是每天開心做好湊仔婆的角色
有說我們只可以擁有孩子10年，就希望我們的10年過得精彩d
依家已經過了差唔多1／3啦，要好好把握餘下的日子 ：）

咁又過左2個多禮拜

由喊哂口到依家自己返學嘻嘻哈哈

咁又已經2個多禮拜啦

成日都問個仔學校做d咩，佢都講唔到

老師就時時話佢係best behaved, very good boy

直至近日終於有d眉目

結論：

1）Ball大部份時間明白老師的指令，知道老師要佢做咩

2）但講故事就唔係好明，所以時時都講唔出有咩新故仔

3）其他小朋友有d都唔明，但就冇傾計，都會留心聽

4）上堂個Rundown Ball都知道，都習慣

5）課室係有個裝好多玩具的大箱，男仔女仔玩具咩都有，不過冇Lego

6) 佢都學左1﹣2首新歌： GoodbyeSong 同一首唔知咩歌（有唱，但估唔到係咩）

7）會成日講： Com'on Mama (可能老師叫佢快d叫得多）

8）食點心要hands on the lap佢時時都提 (不過冇做）

9）小朋友間係唔會share食物既

10）有人帶餅仔有人帶生果等 （今朝佢話有人會帶飯！！）

11）都有足夠時間食點心，可以慢慢食，日日都食哂

12）永遠唔知老師叫咩名，但個個都鐘意佢

13）佢有一個2歲3個月的朋友仔，不過又係唔知人地咩名

14）好多時都係個姐姐自己同佢wee wee,好少自己講要廁所

15）唔係日日都有artwork，不過就都好多嘢做既

16）冇小朋友喊既，因為有好多大姐姐，佢地唔喊 （係2.5﹣7歲既綜合playgroup嘛！）

仲有好多有待發掘既地方

最開心係，佢冇再抗拒，仲好投入好happy，可喜可賀！

忐忑 （完結編？）

話說呢個禮拜，ball成個人唔同哂

冇喊之餘，返學仲好似開心左融入左好多

返學途中會哼句歌會無聊自己笑一餐

見到佢friend既同學仔或工人姐姐會同人hello,揮手

之前唔合作，壞脾氣，無理取鬧等冇哂啦

好似嘻嘻哈哈自己攪掂

今日佢話佢可以自己入課室，頭也不回，在人群中消失

做阿媽既我又忽然百感交集

‘將來有一天，佢真係大個仔就會咁啦，

唔駛阿媽啦，可能仲會嫌你煩’

做阿媽真係唔易。。

3歲定80？（依家得半年唔夠呀！）

其實係唔係真係3歲定80呀？

阿囝仲有好多唔係咁好0既地方要改善

好急呀好急呀！

2歲8個月0既人仔﹣﹣

1。硬頸 ﹣ 可能係似我，佢想堅持0既做法想法

一分都不能退讓，不會妥協，冇情講

一直到佢得到想要既嘢為止

（如何令佢明白有時候可以有多過一種選擇呢？）

2。冇耐性 ﹣ 係硬頸的相反，佢唔鐘意0既嘢1分鐘堅持都做唔到

好似砌puzzle,佢唔識或冇人陪佢就3分鐘都嫌多

快快拾嘢當冇玩過，或發脾氣亂掉玩具發洩 ／／

唔可以等一陣，事事都要即刻有，

食完要即刻走；佢要講嘢你要即刻聽等等

3。bossy - 鐘意發號師令， 要人做嘢
如果唔跟佢意思佢會不停問點解，直到佢明白

4。選擇性冇記性，講完可以即刻唔記得
但邊個送咩禮物俾佢，佢鐘意0既玩具擺邊，
邊度有咩玩，所有車有關0既嘢，一定全部記得！
（就係唔記得俾人鬧過咩呀，俾人罰過咩呀咁）

5。大脾氣 ﹣ 一屋都係火爆人，佢都難獨善其身
就係唔滿意就爆 （掉嘢，喪喊，好大聲講嘢等）
冇事冇幹就好nice好good boy咁

仲有好多古古怪怪嘢，例如勁姿整，講嘢勁大聲等等等等
得番幾個月，唔通咁就一世？

忐忑Part2

今日第四日阿囝0既情緒又異常波動

未到班房己經要喊， 攪左成個鐘

我呢個阿媽最後都要用硬功送佢去班房！
正當我好忐忑之際，放學0既時候情形又360度轉變

阿仔送左幾句金句俾我：

1。聽日唔喊，媽媽唔駛咁勞氣啦！

2。個婆婆話喊會盲0家 （一個成朝努力tum ball入課室的善心婆婆）

3。Edison放學啦，放學冇喊，好乖！

今日佢好似好滿意自己0既勞作所以心情好

聽日又唔知咩事，bless me!

忐忑

唔只係大人，細路仔對改變都會有難適應的情況

今個暑假我地幫Ball報左英文summer school

話就話係school, 不過玩多過學嘢

本來打算係俾阿囝多聽英文，多同唔同人接觸

但就正正因為有“語言障礙”，再加上陌生環境

Ball對summer school出現前所未有的壓力同恐懼

第一日喊唔停次餘，返到屋企諗諗下學校都會喪喊

成日都話唔去學校唔想玩

做阿媽既我，都一時唔知可以點 

（因為我未見過佢咁大壓力，我都唔開心埋一份）

好啦，聽專家話，同佢傾下計，了解下點解咁“唔happy"

佢話係因為唔明白老師講咩 （因為老師／同學都係全鬼佬..)

同佢唔鐘意個老師 （我見到因為老師唔同佢PN嘅老師，

見你喊唔會話tum你，會夾硬抱起你要你玩要無參與）

Ball好多時都受軟唔受硬

有陌生人夾硬黎，仲要唔明中文，Ball自然好抗拒

換個角度自己都唔鐘意啦，可況係3歲未夠既小朋友？

不過又係時候教佢做人既道理

我同阿囝講，唔可以因為唔鐘意一d嘢就意逃避

正如大人唔可以唔返工，司機叔叔唔可以唔出車

班主任唔可以唔鐘意小朋友唔乖就唔返學等等

總好過用食物，用玩具tum佢，總不可以無止境用物質去換乖！

我仲同佢講，世界上好多事物我地都冇接觸過

第一次可能唔慣唔適應

但係人就係要不停學不停進步先會長大

爸爸媽媽都好多嘢唔識但我地都要努力學努力適應等等

唔知佢明唔明，不過遲早都要明白不如有機會就教

其實阿囝都算好乖，佢知道爸爸媽媽想佢乖乖返學

佢好努力用自己的方法麻醉自己，同自己講可以做到

佢今日一早就揀好鞋，同我夾好要帶咩點心

同我講返學唔喊下晝想去公園玩等等

我知道佢都好想做好d, 我覺得咁都好叻仔啦

今朝返到學校，佢話想等一陣先入去，

我見佢眼仔紅哂， 知佢好努力忍住唔喊

我同佢講今日佢自己去課室，我去出面等佢

佢“唔”左一聲，攞好書包仔就自己行

我偷偷跟尾，見佢跟住要求放好書包同鞋就去玩玩具

頭也不回，嗰一刻我真心覺得佢係大個仔左， 

佢知道自己的本份，只係情緒不一定配合

過左個幾鐘我偷偷走近班房，冇聽到有小朋友喊

我知道佢在進步在適應

日後仲有好多咁既情況，

不一定係學校，可以係朋友，工作等等

媽媽都會做隻釣靴鬼，偷偷跟尾，默默支持

我都要學下適應做阿媽成日會忐忑既感覺，

唔好受，不過都係小朋友成長既一部份

我地都要加油呀，希望今日見到你嘻嘻哈哈放學啦 ：）

細路話？大人話？

（斯文但老積的小鬼～）

Ball進入了chatty period後

講嘢越黎越老積

「事件1﹣廁所」

Ball: 個盤唔係咁擺架！

婆：好啦，咁我下次擺好d啦

Ball: **我都費事話你啦，你出番去啦！**

(都唔知佢知唔知自己講緊咩)

「事件2 ﹣ 搭的士」

Ma: 死喇，唔知點解依個時間原來冇車，一定遲到啦！

Ball: **係啦，咁衰既！**

(應該係學左我講，但又係佢明唔明就唔知啦！)

「事件3 ﹣ 準備回家」

Ball: **阿公，唔駛你啦，你0係屋企啦，

好少嘢啫，我自己拎得啦，好輕啫」**

（一定係我！不過我唔知佢記得成句！仲好有自己既style @.@)

「事件4 ﹣ 搽傷口」

Ball: **仲未食得蛋呀？係啦，好番就可以食番d蛋啦！**

Ma:你都有食少少啦

Ball: **醫生話唔得0家，費事啦**

(有一刻我覺得係同老公講緊嘢，而唔係我知仔囉)

我的管家兒子

我有一個管家兒子

唔記得幾時開始, Ball就好鐘意管呢樣管嗰樣

[爸爸出街食飯]

Ball: 點解要出街食飯? 同邊個食飯? 邊個朋友呀?

去邊度食飯呀? 係唔係要揸車去? 

駛唔駛捐山窿呀?

點解仲未返呀? 我想同爸爸goodnight喎

爸爸返黎睇吓我呀? 

[媽媽要出街]

Ball: 出街做咩呀? 買咩呀? 做咩呀?

點解著呢個鞋既? 做咩Edison唔去呀?

唔好咁夜返呀, 我放學你o係屋企等我呀!

我有打電話俾你呀 (即我會打俾你呀!)

bye bye 啦 (講10次以上) 

[屋企人要返工]

Ball: 點解要返工呀? 唔返工得唔得呀?

聽日駛唔駛返工呀? 

點解要換衫返工呀? 做咩吹頭呀?

唔好咁夜返呀! 

bye bye 啦 (講10次以上) 

[餵魚中]

Ball: 點解要餵魚呀? 點解餵少少呀? 

唔餵唔得打o架? 佢地食緊未呀?

佢地食完啦, 點解唔再餵呀?

點解佢地會飽呀? 飽就唔食啦? 飽都食唔得架?

我可唔可以睇吓呀? 下次我餵得唔得呀?

點解唔夠高唔可以餵呀? 

仲有大大小小事件不能盡錄

係唔係個個小朋友都咁關心屋企事呢??

(迷呀!!)

瘋狂Ball@波波池

小朋友之所以咁開心

原因係佢地小小事都好投入

毫無保留, 盡情玩, 盡情Enjoy

一個細細的波波池, 有人會好含蓄坐埋一邊

有人會碌吓, 拋吓波然後走

Ball會200%發哂癲全程投入

好似玩緊世界上最好玩既嘢咁

(都可能因為有個癲爸爸, 成件事自然昇華到另一個level) 

之後喪拋波入個窿度, 

練吓手眼協調又當做運動

兩個大細路, 玩左十幾廿分鐘, 笑到停唔到

留左半個鐘, 出左一身汗, 仲勁過大人做gym

之所以好多細路都身體好

其實有得解!!

(無聊記事) 小小車迷

(無聊記事)

平日我見到Ball做得最多既嘢就係咁!

一早起身, 自己屋企, 人哋屋企, 食完飯, 瞓覺前..都係

完全沉醉, 自言自語, 忘我

今朝, 又係咁, 哈哈

購物反映性格

Ball年紀小小就已經有不少購物體驗

我們都在可控制的範圍及有限選擇下

俾佢自己做決定, 例如

(1) 2揀1 (食飯/食麵, 紅色/藍色)

(2) 可以揀2樣嘢買 (揀2架車仔, 揀2件T-Shirt)

(3) 叫佢為小朋友Party揀食物, 

叫佢揀小朋友鐘意食既食物

我覺得咁樣係對小朋友既一種"尊重"

亦令佢明白要對自己既選擇要負責任

因為咁, 做選擇的時候, Ball好似唔會好多心

好快就有決定, 仲要好專一, 好少會動搖

(就算有其他我覺得比較吸引既,

佢都只係攞嚟睇吓, 唔會改變主意, 

好阿伯, 哈哈)

唔知咁樣係固執定係真係好知道自己想點

又或者呢個係佢星座既特點 --

天蠍: 執著, 信念堅定, 能堅持, 做每件事都非常投入 

(因此天蠍男據了解係好吸引人o家) 

父親節/ 兒童節??

6/15星期日, 即父親節

俾爸爸放假去踢波

亦造就了半個兒童節

一大早爸爸就興高采烈, 換哂波衫同班"叔叔"慶祝

我就同Ball到樓下踩單車

(其實Ball有得踩單車超開心,
都唔關同邊個慶祝咩節事) 

Lunchtime因為時間關係, 一家人去左食烏冬

(又係Ball的最愛, 食左一大碗呀!!)

之後睇睇吓傢俬忽然又唔知點解買左張Pantone摺椅俾Ball

Ball自己揀左藍色, 一路話好鐘意 

(參考圖片)

夜晚先最最最開心

一家人第一次一齊食居酒屋

初初都擔心唔知有咩啱小朋友食

不過原來好多嘢,包括: 燒飯團, 燒粟米, 燒魚, 燒蔬菜等等

都好啱佢食, 仲好好味 :)

Ball食得仲多過我!!

(兩父子對飲中, 好攪笑!!)

飯後一家人到訪Lab-made食雪糕

好似去左仙境咁, 分子雪糕真係唔簡單!

爸爸叫左個爸爸節Special, 上面仲有塊Bacon

食到手指指

開心完滿的一天, 飽到攬住個肚瞓! 

Happy Papa's Day :)